An te vin pou gadé déboulé,
E moun-a sanblé an grap.
Yo dépozé tanbou
Pou sizé é bwè apré swé é hélé an menndé
Yo ri jalaskò adan on kanpo,
E bim ! yo lévé an fòs, yo kouté, é onsèl kou, san klaksonné adan onsèl jès a kò
Tout tanbou koumansé wouklé an prèmyé an sans a déboulé
E dansé an soukous a soukwé kò
E vansé ankrab ka chayé kò é lespri an chimen a déboulé.
An té vin pou gadé…
Tout koulè lawkansyèl défilé an kòstim a ti mòso konféti a lenj pyèsté
pou ri é détouné rédi é dérédi a lavi
ri, ri nou ri, nou rimé an kadans a ti mas
Wi,an té vin pou gadé vwè…
Ankijan an balan mas maten, met-kawnavalyé ka gidonné mas a pyé
pou chak mas pran tibwen an lespri a mouvman a sanblé an voukoum a bòdé
An té vin pou gadé é an vwè
Kominyon a kò an mouvman é lespri a mas
Ka liyé é déliyé kè é lang
Pou kléré sa ki té ja maré an fondas a kréyasyon.

Efrazin

Pa ni mas an 2021 an Gwadloup sésa préfé anonsé yè 10 novanm 2020.
Tini mas pou Kovideee- 19 mas awtizanal, mas awtistik, mas kréyatif, mas chirurjical, mas transparan, mas awkansyèl…màs an tout sòs alòs pran prékosyon, mété màs a zòt !!! KOVID-19 an mouvman.